SARAH AT JOHN LLOYD, NAG-UUMAPAW ANG PASASALAMAT SA BUONG SAMBAYANAN

Tulad ng dami ng tao sa mga sinehan, nag-uumapaw rin ang kaligayahan ng box-office royalties na sina Sarah Geronimo at John Lloyd Cruz sa matinding suporta ng sambayanan sa hit romantic-comedy film nilang "It Takes A Man and A Woman" na kumita agad ng P300 milyon sa loob lamang ng dalawang linggo. Ito ang ikatlong pelikulang Pilipino na umabot ng P300 milyon pagkatapos ng "Sisterakas" at "The Unkabogable Praybeyt Benjamin" na parehong kabilang sa listahan ng highest-grossing Filipino films of all time. 

Ayon kay Sarah, kapwa sila nagpapasalamat ni John Lloyd sa lahat ng mga nagmamahal sa love story nina Laida (Sarah) at Miggy (John Lloyd). "Overflowing 'yung suportang binigay ng tao sa amin," pahayag ni Sarah. "Actually, 'yung umabot kami ng P100 million in less than a week ay sobra-sobra na. Tapos ngayon, na-reach na ng movie 'yung P300 million mark. Wow! Maraming-maraming salamat po talaga." 

Graded 'A' ng Cinema Evaluation Board (CEB), ang "It Takes A Man And A Woman" ay certified box-office hit na mula sa unang araw nito noong March 30 kung kailan tumabo ito ng ₱32.6 million. Higit pang napatunayan ang lakas ng 'Laida-Miggy magic' nang kumita ang pelikulang idinerek ni Cathy Garcia-Molina ng P100 million sa ikaapat na araw pa lamang nito at humataw ng P200 million sa loob lamang ng walong araw. 

Dahil sa pagtabo nito ng P300 milyon, na-break na ng "It Takes A Man And A Woman" ang record ng unang dalawang installments ng itinuturing ng most successful Filipino romantic-comedy movie series. Ang unang Laida-Miggy film na "A Very Special Love" ay kumita ng P179.3 milyon noong 2008. Samantala, ang sequel nitong "You Changed My Life" ay humataw ng P225.2 milyon noong 2009. 

Co-produced ng Star Cinema at Viva Films at sa ilalim ng panulat ni Carmi Raymundo, tampok rin sa "It Takes A Man And A Woman" sina Joross Gamboa, Gio Alvarez, Matet De Leon, Al Tantay, Irma Adlawan, Guji Lorenzana, Rowell Santiago, at Dante Rivero. Introducing sa pelikula ang model-host na si Isabelle Daza. 

Huwag palampasin ang grand onscreen reunion nina Laida at Miggy sa "It Takes A Man And A Woman," palabas pa rin ngayon sa mga sinehan nationwide.