Sasabak si Yoo-Chun, na minahal ng mga Pinoy bilang si Lee Sun-Joon ng "Secret Love: Sungkyunkwan Scandal" at at Prince Lee Gak ng "Rooftop Prince," sa kanyang pinakamalaking hamon sa kanya bilang aktor sa kanyang pagganap bilang si Detective Julius Han sa dekalibreng melodrama na nagpapanalo sa kanya bilang Excellent Actor in a Mini-Series sa 2012 MBC Drama Awards. Isa rin siya sa piling Korean actors na gumawa ng dalawang serye sa loob ng isang taon at nakagawa ng TV projects sa tatlong magkakaibang Korean TV networks.
Si Eun-Hye naman ay nagbabalik sa Philippine TV matapos siyang huling mapanood ng mga Pinoy bilang si Janelle ng "Princess Hours" at Hannah ng "My Fair Lady." Isang premyadong aktres at fashion icon sa Korea, si Eun-Hye ay pinarangalan pa lang bilang Hallyu Star of the Year sa 2012 MBC Drama Awards para sa kanyang pagganap bilang Joy Lee sa "Missing You." Kinikilala siya ngayon bilang isa sa pinakamahalagang personalidad sa Korea at isa rin sa pinakamataas ang bayad bagamat nasa edad 30 pababa pa lang siya.
Kaya naman ganoon na lang ang pananabik ng Koreanovela fans sa bansa sa espesyal na handog na ito ng ABS-CBN ngayong summer.
Panoorin sa "Missing You" ang kuwento ng isang lalaking kailanman ay hindi isinuko ang pag-ibig para sa babaeng pinakamamahal niya.
Kinse anyos pa lang sina Julius at Joy ng mahanap nila ang pag-ibig sa isa't isa. Sa hindi inaasahang pangyayari ay susubukin sila ng tadhana ng pareho silang makidnap ng mga armadong kalalakihan.
Papalaring makatakas si Julius mula sa pagkakabihag at hihingi ng tulong. Ngunit iba ang naging dating nito kay Joy dahil para sa kanya ay inabandona siya ni Julius at mas pinili ang sarili niyang kaligtasan.
Nang binalikan siya ni Julius ay hindi na siya matagpuan at idineklara ng patay ng mga awtoridad. Lingid sa kaalaman ni Julius na isang kaibigan pala ang sumaklolo kay Joy at iniligtas siya sa bingit ng kamatayan.
Matapos ang 14 taon, isa ng homicide detective si Julius at hindi pa rin isinusuko ang pag-asang makita muli si Joy. Si Joy naman, sa kabilang dako, ay bumalik na sa Korea bilang si Zoe, isang fashion designer, kasama si Harry (Yoo Seung-Ho), ang lalaking tumulong at kumupkop sa kanya.
Sa muling pag-krus ng kanilang mga landa, muling mapupukaw ang kanilang mga damdamin. Nararamdaman ni Julius sa kanyang puso na si Zoe ang babaeng kanyang minahal noon at matagal ng hinahanap. Ngunit ikukubli naman ni Joy ang katotohanan mula sa dating minamahal para maghiganti sa pinaniniwalaan niyang pag-abandona sa kanya ni Julius sa gitna ng panganib.
Hanggang kailan lalaban si Julius para patunayang sina Zoe at Joy ay iisa? Ano ang mangyayari kapag nalaman ni Joy ang tunay na kwento sa biglang pag-iwan sa kanya ni Julius? Muli kaya nilang bigyan ng pagkakataon ang naudlot nilang pagmamahalan?
Huwag palalampasin ang pag-uumpisa ng "Missing You" ngayong Lunes (Apr 22) pagkatapos ng "Apoy sa Dagat" sa Primetime Bida ng ABS-CBN. Para sa karagdagang updates, i-like ang https://www.facebook.com/abscbnkapamilyanovelas sa Facebook at i-follow ang @KapamilyaNovela sa Twitter.
No comments:
Post a Comment