BAGONG CINEMA ONE, MASISILAYAN NGAYONG MIYERKULES

Bilang selebrasyon sa mahigit sampung taon na pangunguna ng Cinema One sa lahat ng cable channel sa bansa, ilulunsad nito ang mas pinaganda at pinakulay nitong anyo ngayong Miyerkules (Abril 17).

Bagama't isang malaking pagbabago ang magaganap sa Cinema One, sinisiguro naman nito na de-kalidad pa rin at mas paghuhusayin pa nito ang mga programang ihahatid sa mga tagasubaybay.

Katunayan,  ginawang mas kapana-panabik ang movie blocks ng Cinema One tulad ng "Monday Drama," na nagtatampok ng mga pelikulang kukurot sa puso ng mga manonood tuwing 9:00 ng gabi; "Tuesday Comedy," na naghahatid ng katatawanan sa bawat tahanan tuwing 9:00 ng gabi; "Wednesday Winners," kung saan bida ang mga pelikulang humakot ng mga parangal sa loob at labas ng bansa tuwing 9:00 ng gabi, "Thursday Horror," na nagbibigay ng mga makapanindig-balahibong pelikula tuwing 9:00 ng gabi; "Star Power Fridays," na nagpapalabas ng mga pelikula ng ilang tampok na artista tuwing 10:00 ng gabi; "Sine Astig" na maghahandog ng mga independent films tuwing Sabado ng gabi mula Mayo; "Romance Central" tuwing Linggo, 6:00 ng gabi; at "Blockbuster Sundays" na nagtatampok ng mga pinakapatok sa takilya tuwing 8:00 ng gabi.

Kasama rin sa makeover ng Cinema One ang bago nitong logo na ginawang mas moderno na sumasalamin sa pagiging numero unong cable channel nito. Limang taon na mula ngayon nang ipinakilala ang kasalukuyang logo ng Cinema One noong 2008 na may disenyong three-dimensional o 3D.

'Wag palampasin ang paglulunsad ng bagong Cinema One ngayong Miyerkules, 7:00 ng umaga. Ang Cinema One ay mapapanood sa SkyCable Gold, SkyCable Silver at sa iba pang cable operators nationwide. Para sa ibang impormasyon at updates, mag-log on lamang sa http://www.facebook.com/Cinema1channel.