Wala nang makapipigil pa sa pagbangon ni Mercedes (Jessy Mendiola) mula sa pang-aapi at pangaagrabyado nina Malvina (Vivian Velez) sa kanya at sa kanyang pamilya sa mas lalo pang tumitinding kwento ng hit primetime serye na "Maria Mercedes." Para makapaghiganti, lihim na nagpakasal sina Mercedes st Santiago (Ariel Rivera) nang sa gayon ay magkaroon ng karapatan si Mercedes na maging heredera ng kumpanya. Agad na sinanay ang ngayo'y si Mrs. Maria Mercedes Alegre-Del Olmo sa iba't ibang larangan para ihanda siya sa bago niyang papel bilang Presidente at CEO ng San Carmelo Industries, ang posisyong matagal ng inaasam ni Malvina. Sa kanyang bagong kapangyarihan at yamang angkin, mas palaban na si Mercedes at mas determinado na mapagbayad si Malvina sa pagpaslang sa kanyang kapatid na si Guillermo (Marx Topacio). Paano bubuwelta si Mercedes kay Malvina? Paano magbabago ang pagkatao ni Mercedes ngayong nilamon na siya ng poot at galit? Ano ang naghihintay sa kanya sa oras na mawala si Santiago? Mahanap niya pa kaya sa kanyang puso ang puwang para umibig muli? Huwag palalampasin ang inaabangang pagbangon ni "Maria Mercedes" gabi gabi, pagkatapos ng "Got to Believe" sa Primetime Bida ng ABS-CBN. Para sa updates, sundan ang @MariaMercedesPH sa Twitter at i-like ang www.facebook.com/MariaMercedesOfficial sa Facebook. Ipahayag ang inyong opinion sa show gamit ang hashtag na #MariaMercedes.
No comments:
Post a Comment