34 KALOKALIKES, MAGPAPATALBUGAN SA WEEK-LONG FINALS NG “IT’S SHOWTIME”

Malapit nang makilala ang ikalawang Ultimate Kalokalike ng ABS-CBN
noontime show na "It's Showtime" sa grand patalbugan ng 34 Kalokalikes
sa "Kalokalike Face 2" grand finals week nitong Lunes hanggang
Biyernes (Setyembre 23-27).

Sasalain ang mga ito upang makuha ang Top 15 Kalokalike grand
finalists na siyang iaanunsyo at maglalaban-laban sa grand finals
ngayong Sabado (Sept 28). Sa pagkuha ng Top 15 na ito, mas makikilala
pa ng madlang people ang mga kwento at inspirasyon sa likod ng
panggagaya nila sa kanilang idolong celebrities.

Sino nga kaya ang tunay na nag-level up at siyang karapat-dapat na
magwagi bilang Ultimate Kalokalike at ang premyong P300,000?

Samantala, iniimibitahan naman ang iba't ibang grupo, magkakabarkada,
o magkakapamilya na sumali sa bagong pakulo na "Jambunganga" at gumawa
ng mga kakaibang tunog at musikang nakakaaliw.

Bumuo ng group na may lima hanggang 12 miyembro, at mag-audition sa
ABS-CBN Audience Entrance sa Sgt. Esguerra St. sa Quezon City mula
Lunes hanggang Biyernes, 3-5PM at hanapin sina Heide Villanueva at
Jonathan Maximo.

Ang mga auditionees ay kailangang magdala ng valid ID at birth
certificate kung ang miyembro ng grupo ay 14 taong gulang pababa.

Ang "Kalokalike Face 2 Grand Finals" ay bahagi ng pasabog na weekend
ng ABS-CBN kung kailan tampok din ang pagwawakas ng isa sa
pinakamatagumpay na game show adaptations sa Philippine television,
ang "Kapamilya Deal or No Deal." Sa huling bira nito ngayong Sabado,
ang batikang broadcast journalist na si Korina Sanchez hahamon na
makipagtawaran kay Banker at susubok na maiuwi ang P2 milyong jackpot
para sa kapakanan ng kanyang napiling beneficiary.

Pagpatak naman ng 8:15 PM, tutukan kung sino ang tatanghaling
kauna-unahang "The Voice of the Philippines" sa pinakahuli at
inaabangang showdown ng Final Four artists na sina Janice Javier,
Klarisse de Guzman, Myk Perez, at Mitoy. Huwag ding palampasin sa
Linggo (Sept 29) ang ikalawang bahagi ng two-part finale kung saan may
hatid ding performances si Taboo ng grupong Black Eyes Peas at si
Shane Filan na miyembro ng dating boyband na Westlife.

Huwag palampasin ang "It's Showtime" sa ABS-CBN, 12:30 PM mula Lunes
hanggang Biyernes at 12NN tuwing Sabado. Manatiling updated sa
programa sa pamamagitan ng pag-follow sa @ItsShowtimeNa sa Twitter.